Riektegieđahallan

Rihkusriektegieđahallamis áššeoasálaččat leat rihkkosa oaffar dahjege áššeoamasteaddji, sivahuvvon dahjege vástideaddji ja sivaheaddji. 

Áššeoamasteaddji lea rihkusgearregiin áššeoasálaš, jus sus leat gáibádusat vástideaddji dahjege rihkkosis eahpiduvvon olbmo guovdu. Sivaheaddji buktá ovdan rihkusgearregiin vástideaddji guoskevaš sivahusa. Rihkusášši čielggadeapmin gearregiin gullet vejolaččat maiddái duođašteaddjiid.

Jus ášši ovdána gearregiidda, oaffar sáhttá jearrat geavatlaš rávvagiid Rihkusoaffargohcimis.

Girjjálaš meannudeapmi

Rihkusášši sáhttá gieđahallot gearretrievttis girjjálaččat. Dalle eai ordnejuvvo njálmmálaš gearregat. Girjjálaš meannudeamis duopmár čoavdá ášši girjjálaš materiála vuođul. Girjjálaš materiála lea bolesa gárvvistan ovdadutkanbeavdegirjji, masa leat girjejuvvon ovdadutkamis čielgan áššit.

Girjjálaš meannudeamis gieđahallat čielggaduvvon láivves rihkkosiid. Girjjálaš meannudeami mihttomearrin lea jođálmahttit ášši gieđahallama čielggaduvvon áššiin. Vai ášši sáhttá gieđahallat girjjálaččat, vástideaddji galgá dovddastit dagu ja miehtat girjjálaš meannudeapmái. Áššeoamasteaddji galgá maiddái miehtat meannudeapmái. Vuollel 18-jahkásačča dahkan rihkkosiid eai gieđahala girjjálaš meannudeamis.

Sivahuvvon dahje vástideaddji oažžu maiddái girjjálaš meannudeamis buktit ovdan girjjálaččat iežas oainnus gáibádusain su vuostá.

Gearretriekti sádde girjjálaš meannudeamis addojuvvon duomu vástideaddjái ja áššeoamasteaddjái.